لما تكون واقف مع واحد صاحبك و بعدين تحاول تمد ايديك ناحية قفاه تبص تلاقيه لا ارادي بيخبي قفاه و كأنه متأكد انك مش هاترحمه و هاتنشه قفا يخلي نظره6/96 و كل ما حد يحاول يعمل معاك نفس الحركة انت كمان لا رادي بتتصرف كده و الحل يا اصحابي انك تسيب نفسك خالص ولا تحط في بالك ولو حصل ان فيه ضرب وقتها لازم تتأكد ان لكل طريق بداية و ضربة القفا دي هي البداية على الطريق الجديد نحو تحقيق حياة سعيدة كلها حاجات حلوة ؛ و مش معنى كده انك تروح تطلب قفا علشان حياتك تكون سعيده لااااا انا بحاول ابين الفرق بين القفا المفاجيء و القفا المتفق عليه و اللي بيكون من غير طعم ولا لون ولا رائحة انما هو له صوت بس .
كيف تتعامل مع اول ضربة قفا :
بكل بساطة و بعد ما تسمع اول قفا طرقع لف رقبتك براحة و بص وراك شوف مين اللي ضرب هتلاقيه واحد بيضحك و مبسوط انت كمان ما تزعلش و اضحك بس ضحكة خفيفة و انت بتقول ايه رأيك أظن مفيش قفا احسن من كده و هو طبعا هايفرح اوي و يطلب كمان قفا و انت طبعا لازم توافق و كمان ايه لو ينفع تسمح له بشلوط هايكون دفعة قوية للأمام بجد .
ضربة شلوت :
بعد ما تاخد ضربة الشلوت هاتبص تلاقي نفسك لا ارادي بتاخد خطوة للأمام و بتطلع قدام و ايه كمان ده انت بتشوف الدنيا بتنور و تطفي و تفضل كده شوية و انت لازم تعرف تتصرف كويس علشان تستفيد من كل ضربة شلوت تتوجه لك و تكون هي الدافع لخطوة جديدة نحو مستقبل جديد .
الاختلاف ما بين ضربة الشلوت و ضربة القفا :
ضربة القفا غالبا بتدفعك انك تبص وراك و ممكن تميل لتحت بزاوية من 40 ْالى 60ْ ؛ أما ضربة الشلوت فهي بتجبرك تبص لقدام احسن الخطوة اللي انت اخدتها تخليك تخبط في حاجة ، و ضربة القفا بتصدر صوت عالي ممكن يفضح الدنيا اما ضربة الشلوت فهي بصوت مكتوم لا يسمع في مدى اكثرمن 3م .
نصيحة :
ضربة القفا و ضربة الشلوت من الامور المهمه في حياة الشخص و بيتأكد من خلالها انه في المقدمة و لذلك ننصح كل شاب أو فتاة ياخد ضربة قفا او ضربة شلوت أنه يتفهم الموقف و كويس و يعرف الدوافع للضربة و يحدد مين اللي اصدرها و يتصرف معاه بطريقة من اتنين ( يا مكافأة يا خناقة ) و انصح كل شاب و كل فتاة يتبع اسلوب المكافأة و يكون واثق تماما ان كل ضربة شلوت او قفا ما هي الا تأكيد للصدارة .
