صعب تفتح صفحه جديده وتنسى كل اللى فات وتعمل (شيفت ديليت ) لكل الملفات القديمه المليانه اللى حرقت اعصابك وتعبت ايامك وماعدتش ينفع ابدا انك تفضل زى ما انت !
الحكايه ممكن تكون صعبه خاصه ان مفيش حواليك مهتم ان يبدا من جديد ولا فى دماغه اصلا هو فيه جديد ولا قديم وتحس ان حياته بقت زى شريط الكاسيت اللى فيه اغنيه واحده بس كل ما تخلص تشتغل من جديد حتى لو الشريط سف برضه تفضل شغاله هى هى .
من ناحيه تانيه يا ترى ايه الدافع القوى جدا اللى ممكن يخليك تفكر تبدا من جديد ؟؟ وايه اللى ممكن يقنعك من غير ضغط ولا فوران اعصاب ان الحكايه كده بوخت ولازم ترجع من الاول وتصفر العداد عشان تقدر تستمر .. فى واقع الظروف دى بس ممكن تحصل على اشاره احساس جواك لوحدك بتقولك كفايه .. لف وارجع تانى .
الاحساس ده اكيد هو اللى ممكن تعتمد عليه فى وسط كل الظروف دى .. مش هاتيجى من حد تانى .. انت بنفسك اللى هاتعرف وتحس وانت برضه المطلوب منك تتحرك لما تحس الاشاره لان ده لو محصلش, الاشاره ممكن ماتجيش تانى وتمشى القافله وتسيبك واقف مكانك !
طب تعرف ازاى ان دى الاشاره وانها صحيحه ومش جايه فى وقت غلط ولا مغشوشه .. ببساطه انت برضه اللى هاتحس هى حقيقه ولا مغشوشه .. كل واحد اكيد عنده مؤشر هو لوحده بيتحكم فيه ولو المؤشر وصل لاعلى معدل وانت كالعاده طنشت وكبرت دماغك وماحستش ان دى اللحظه الحاسمه .. صدقنى هاتفضل زى ما انت .. محلك سر .. زى ما انت والله ما انت قايم من مكانك .. والناس هتلف وتروح وترجع وتعيش وتتجوز وتخلف ويعكروا اراضى ويبنوا دول وانت سيادتك قاعد زى ما انت فى نفس الدائره اللى طردتك من شويه وانت رافضت تتحرك وكسلت تبدا من جديد .. قبل ما يفوت الاوان .... الفشل مش معناه السقوط.... الفشل هوه لو سقطت ومقمتش تانى ...... جرب تانى وتالت ورابع...................بس ياريت ,انك لو سقطت ......... لف وارجع تانى.
ليست هناك تعليقات:
إرسال تعليق