للرجال وقفات عديدة ومختلفة
وكلما زاد قدر الرجولة فى الرجل
زادت قيمة وقفته
فهناك رجال وقفتهم ... مش ولابد
ونص نص
وما ان يقفوا بجانبك فى وقت الشدة
حتى تزداد شدتك شدة
وتجد نفسك تلعن اليوم اللى وقفوا فيه جانبك
ولكن فى نفس ذات الوقت
مش قادر تنكر محاولتهم للوقوف بجانبك وقت محنتك
فبتضطر ذوقيا منك انك تشكرهم
رغم العك اللى عكوه فى حياتك
وهناك رجال وقفتهم معدومة
فهم اساسا لا تقم لهم قومة
حتى يستطيعوا الوقوف بجانبك
فهم مثل بطة بلدي
تبقى بتموت قدامهم ومحتاج مجرد سندة
وتجدهم جالسين بأنتخة
متفرجين على سقوطك المدوي
مستمتعين بنحيبك
وبعد ما الدنيا تلعب لعبتها الدنيئة معاك بحقارة
يبصولك باذبهلال ويقولوا لك
طب ماقولتلناش لييييييييييييه
كنا وقفنا جنبك
وكأن البعيد اعمى مش شايفك وانت بتقع
وهناك رجال .... وقفتهم مقتصرة فقط
على مدى فحولتهم كذكور
ويعتقدوا خطأ انهم كلما زادت نسبة فحولتهم
كلما زادت نسبة رجولتهم
ودول مالهومش مكان من الاعراب فى هذه التدوينة
لان دول ما يبقوش رجالة ولا مؤاخذة
دول بيبقوا مجرد ذكور
والفرق بين الرجولة والذكورة شاااااسع
وهناك رجال ..... وقفتهم على مزاجهم
فهم يقفوا بجانبك
اذا كان فى وقفتهم مصلحة لهم اجلة او عاجلة
وهؤلاء انواع سيئة جدا من الرجال
فهم يقايضونك فى محنتك
فهم يريدون مقابل للوقوف بجانبك
وإلا انهم سيحرمونك شرف الوقوف جانبك فى شدتك
وهناك رجال .... وقفتهم وقفة رجالة بصحيح
فالرجل من هذه النوعية
تلاقيه مركز معاك اوى
مركز فى تفاصيلك
ليس فضولاً منه
ولكن اخلاصا منه لك
وللعلاقة التى تربطكم سويا أيا كانت
فيحاول _ قبل ما تقع _ انه ينقذ ما يمكن انقاذه منك
والاهم من ده كله طريقة الانقاذ
فهو يقف جنبك بشياكة
فلا تشعر به
فهو خفيف كنسمة
فلا يحرجك بوقوفه جنبك فى محنتك
واذا تكلمت عن محنتك التى زالت بسببه
يتصنع عدم المعرفة
وتلاقيه بيقولك والله مخدتش بالي
انا عملت كدة بالصدفة
انت بس علشان طيب ربنا سترها معاك
فتشعر بان عزة نفسك مازالت محفوظة امامه
وكبريائك لم يمس بسوء
وللعلم فهناك فرق شاسع بين الرجل والرجولة
فكلمة رجل قد تطلق ويقصد بها الذكر
الذى هو النوع المقابل للانثى
ولكن الرجولة تعنى المروءة والكمال من الصفات الحسنة
الرجولة وصف يمس الروح والنفس والخلق
اكثر مما يمس البدن
ولذلك فهى ليست مقتصرة
على طويل الجتة عريض المنكبين
وانما قد تجد شخص يتمتع برجولة فاااائقة في تصرفاته
وهو بسيط الحجم سفيف
والرجولة ليست مقتصرة على الذكور
فمن منا لم يقابل فى حياته سيدة او فتاة
وقفت بجانبه وقفة رجالة؟
ولكن تبقى متعة الرجولة والاحساس بها
عندما تصدر من رجل
فاحساسك انك قابلت رجلا يتمتع برجولة
له مذاق اخر
عن انك قابلت امراة تتمتع برجولة
يكفى انك تشعر ان الرجولة
مكمنها الطبيعى فى الرجل
فعندما تصدر من رجل
تشعر بان موازين الكون مظبوطة
ولا يوجد بها اختلال
ولذلك اسأل الله العلي العظيم
ان يرزق رجالنا ..... بالرجولة
كى تستقيم الأمور
__________
أخر الكلام
الرجولة أدب .... مش هز اكتاف
ليست هناك تعليقات:
إرسال تعليق